余少镭：白话入边有禅机

　　无论边度嘅方言，最有代表性、最有生命力、最有吸引力嘅地方，都係嗰啲口语、俗语、口头禅、歇后语等民间语言。学习或者研究一个地方嘅语言文化，从呢啲民间语言入手，係最悭时悭力嘅途径来嘅。呢条路，亦正係我哋“白话广州”而家行紧嘅路。

　　《粤语口头禅》呢本书，由“风气篇”、“谋生篇”、“好逑篇”、“知人篇”、“观俗篇”同埋“附录”六个部分组成，收入书中嘅132条口头禅同埋15首歌谣等内容，都係作者工作之余有心收集得嚟噶，虽然冇将全部嘅粤语口语冚棒唥收埋（实际上係无可能嘅），但佢哋都係喺粤语地区流行最广、最有代表性嘅口语同埋歌谣。每一个词条入边，既有注音、释义、例句，亦有深入浅出嘅发挥；而每一个词条嘅凡例发挥，都係一篇结构完整嘅杂文，既係词条本身嘅发挥，又冇拘泥于词条本身嘅限制，而加入咗作者自己对于同呢个词有关嘅历史、文化、习俗、社会现象有关嘅思考，有啲幽默风趣，有啲切中时弊。比如，喺书中嘅“街坊”词条入边，作者写到：“现代城市生活中的街坊关系，总体来说已乏善可陈。有人对比城里与乡下人之异同编段子，其中一句说的是，‘手机存了两三百个号码，没有一个是邻居的’……”相信睇完之后，粤语地区嘅读者可以加深咗自己对母语嘅认识，而嗰啲同我一样有志学习粤语嘅人，肯定能够深深噉记住呢个相关嘅口语，兼且喺日常生活中准确运用。

　　但係，我冇少少唔明嘅係，作者对所有词条嘅注音，冇依照《广州话拼音方案》嚟进行，而係使用咗普通话近音字注音法。比如“擒青”，粤语规范注音係kem4 qing1，作者注係“读肯枪”，“肯枪”呢两个字，普通话读kěn qiāng，同kem4 qing1差好远。我谂作者嘅本意，係畀外地人学白话指条捷径，但我惊啲唔识白话嘅人如果照此嚟读，可能会畀误导咗。重有嘅就係，个别词条嘅来源，作者讲得唔係几准确。比如，重係呢个“擒青”，作者噉话：“广东人发明了‘擒青’这话，一定是基于对‘青’的审美价值的特殊认识。不信你看：大自然最怡人的情境就是‘青天’、‘青草’和‘青山’……”事实上，“擒青”一词来源于醒狮，传统嘅舞狮，要做埋望青、惊青、醉青等几个步骤先至可以“采青”，如果随便郁咗冇几下就“采青”，就会畀人笑係“擒青”。后嚟，“擒青”就引申为迫不及待嘅意思啦。

　　但係瑕不掩瑜，虽然有啲值得商榷嘅地方，《粤语口头禅》仍不失为一本学习粤语入门嘅好书来噶，好似我噉，摆一本喺枱度，得闲学几句，获益匪浅。

(责任编辑：久黑必白)